عيد_مبارك

عيد_مبارك

بقلم / عبد الرحمن شعبان سعد

العيد مش لبس جديد… العيد قلب جديد

(الحلقة الأولى من العيد)

العيد… الكلمة اللي أول ما بنسمعها بنفتكر الضحكة بنفتكر اللمة بنفتكر السلام وبنفتكر الفرح اللي كنا بنحسه وإحنا صغيرين من غير ما نفهم ليه
بس خلّيني أسألك سؤال بسيط من القلب هو العيد فعلًا لبس جديد؟ ولا أكل وحلويات؟ ولا زيارات وخروجات؟
ولا العيد في حتة أعمق من كده بكتير؟
الحقيقة إن العيد مش شكل العيد معنى مش يوم بيعدي العيد حالة بتدخل القلب
ربنا سبحانه وتعالى ما جعلش العيد صدفة ولا خلاه مجرد مناسبة العيد جاي بعد طاعة بعد تعب بعد صبر
علشان كده ربنا قال في كتابه الكريم: ﴿وَلِتُكْمِلُوا الْعِدَّةَ وَلِتُكَبِّرُوا اللَّهَ عَلَىٰ مَا هَدَاكُمْ وَلَعَلَّكُمْ تَشْكُرُونَ﴾
يعني العيد مش بداية العيد نتيجة نتيجة إنك حاولت وتعبت وقربت
العيد فرحة بس مش أي فرحة فرحة ما تغضبش ربنا ولا تكسر خاطر حد ولا تنسيك أصل الحكاية
النبي ﷺ قال: «للصائم فرحتان: فرحة عند فطره، وفرحة عند لقاء ربه»
يعني الفرح الحقيقي مش بس في اللحظة لكن في الأثر وفي القبول وفي الإحساس إن ربنا راضي
خلّيني أقولك حاجة مهمة مش كل الناس داخلة العيد وهي مبسوطة في ناس داخلة العيد وقلبها تقيل في ناس فاقدة حد في ناس زعلانة في ناس شايلة وجع ما حدش شايفه
بس العيد مش شرط ييجي علشان يمسح الوجع العيد ييجي علشان يقولك لسه في أمل
ربنا سبحانه وتعالى قال: ﴿قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ﴾
يعني مهما حصل باب ربنا مفتوح ومهما وقعت لسه في فرصة
العيد كمان مش فرحة لوحدك العيد مشاركة العيد صلة رحم العيد سلام يتقال من القلب مش مجرد كلمة على اللسان
النبي ﷺ قال: «لا يحل لمسلم أن يهجر أخاه فوق ثلاث»
يعني العيد فرصة نصلّح نعتذر نسامح ونقول: الدنيا ما تستاهلش
اللي بيدخل العيد وهو متخاصم بيضيّع على نفسه معنى كبير لأن العيد مش في البيت العيد في القلب
خلّيني أقولك على أجمل لبس ممكن تلبسه في العيد مش جديد مش غالي مش ملفت
أجمل لبس في العيد هو الرضا
إنك ترضى وتقول: يا رب، الحمد لله حتى لو مش كل حاجة تمام بس إنت موجود وإنت شايف وإنت مدبر
ربنا قال: ﴿رَضِيَ اللَّهُ عَنْهُمْ وَرَضُوا عَنْهُ﴾
تخيل قلب ربنا راضي عنه وهو راضي عن ربنا ده العيد الحقيقي
في أول يوم عيد ما تسألش نفسك: لبست إيه؟ اسأل: قلبي عامل إيه؟
ما تسألش: خرجت فين؟ اسأل: قربت من ربنا قد إيه؟
العيد مش لحظة تفرح فيها العيد قرار قرار إنك تبدأ قرار إنك تصلّح قرار إنك ترجع
وفي أول حلقة من عيد مبارك مع عبد الرحمن وآيات بنقولك:
خلي العيد بداية جديدة مش مجرد يوم يعدي وخلي الفرح يوصل للي حواليك قبل ما يوصل لك
عيد مبارك عليك وعلى قلبك وعلى روحك
ولسه الحكاية مكملة…