الحياة بتمشي بين فرحة وأحزان بقلم اماني منتصر السيد

الحياة بتمشي بين فرحة وأحزان
بقلم/اماني منتصر السيد
يوم يضحك لنا.. ويوم يوجع الوجدان
نمشي في طرقها نتعب ونتوه
ونرجع نقف تاني مهما الزمن قسَى علينا وجار

فيها حكايات بتبدأ بحلم صغير
وفيها قلوب شايلة شوق سنين كتير
ناس تقابلنا وتسيب جوانا أثر
وناس تمشي كأنها ما كانت يوم قدر

نتعلم إن الدنيا مش دايمة لحد
وإن الصبر وقت الضيق أكبر سند
وإن اللي بيزرع خير في الطريق
لازم يوم يحصد فرح يداوي الحريق

كم مرة بكينا واحنا ساكتين
وخفينا وجعنا بين كلمة “كويسين”
لكن جوا الروح كان فيه صوت خافت
يقول: بكرة أحلى.. والحلم لسه ما ماتش

الحياة مش سهلة.. ولا كلها أمان
فيها خوف وتعب وأوقات حرمان
بس فيها كمان شمس بعد المطر
وفيها أمل بيولد من قلب الخطر

علشان كده لازم نعيش متفائلين
حتى لو اتعبنا الطريق سنين
نمسك في النور مهما الليل طال
ونؤمن إن بعد العسر راحة ومحال يدوم الحال

كبرنا وعرفنا إن السعادة لحظات
وإن العمر بيجري أسرع من الحكايات
علشان كده لازم نعيش بقلوب راضية
ونسيب أثر طيب في الدنيا الفانية

خليك قوي مهما الرياح تميل
ومهما الحزن في قلبك يوم يشيل
ابتسم للدنيا وقول: لسه الأماني بخير
طول ما الروح بتدعي.. يبقى الجاي أجمل بكتير

الحياة رحلة بنعدي فيها ونمشي
نقابل وجوه ونفارق وننسي
لكن يفضل جوانا يقين جميل
إن رب الخير عمره ما يسيب قلب عليل

فعيش بالأمل.. وخلي التفاؤل عنوان
وارسم لحلمك ألف باب ومكان
أصل الحياة مهما تعبتنا وأخذت من سنين
بنفضل عايشين… وبنحلم… وبكرة أكيد هيحنّ علينا من جديد.
بقلم اماني منتصر السيد