قصص وحكايات “الملك العقرب”

بقلم/ عبدالرحمن غريب

 

النهاردة هنتكلم عن أسطورة فرعونية خرافية بمعنى الكلمة، شخصية تقريبًا هي اللي خلقت كلمة “الغموض”. والعنوان أكيد مألوف لكثير من الناس، لأن اتعملت أفلام أجنبية وقصص عن “الملك العقرب”، لكن هنا الحكاية مختلفة تمامًا، لأننا هنبدأ من أول السطر.

 

في عصور الفراعنة الأولى، وبالأخص في “العصر العتيق”، أو بشكل أدق عصر الأسرة الأولى والثانية، واللي زي ما ناس كتير تعرف، اتسمى كده لثلاثة أسباب رئيسية:

 

1. لأنه كان مرحلة التكوين والتشكيل الحضاري والسياسي للحضارة الفرعونية، واللي استمرت لأكتر من ٣٠٠٠ سنة.

 

2. تدعيم الوحدة بين الشمال والجنوب وتنظيم الإدارة، وكمان وضع تقاليد الملوكية، لأن في الوقت ده كانت مصر مقسومة إلى “مصر العليا” و”مصر السفلى”.

 

3. مدينة “ثنيس” كانت العاصمة وقتها، ولقينا فيها آثار مرتبطة بـ “الملك العقرب” أو “الملك نعرمر” اللي هو نفسه الملك مينا موحّد القطرين.

 

والآن دعونا نوضح بعض النقاط الهامة..

 

التحديد الزمني للعصر ده فيه آراء كتير، لكن هنمشي مع القصة الأكتر انتشارًا وتصديقًا، وهي رأي العالم “جيمس هنري”، اللي قال إن بداية العصر العتيق كانت قبل ٣٤٠٠ سنة قبل الميلاد. وده رأي اتفق عليه علماء ومؤرخين كتير.

 

والآن ننتقل للبطل: الملك العقرب.

العلماء أطلقوا عليه الاسم ده لثلاثة أسباب رئيسية:

 

1. لأنه تم العثور على آثار بتُظهر اسمه في هيئة “حشرة العقرب”، وده خلى العلماء يفسروا إن ده اسمه أو لقبه، ومن هنا جه اسم “الملك العقرب”.

 

2. في “أبيدوس” (محافظة سوهاج حاليًا) تم العثور على مقبرة مكتوب عليها اسم “كا” على إحدى الأواني الأسطوانية، والمقبرة اللي جنبها كانت لـ “الملك نعرمر”. وده بيشير إلى إن اللي بدأ محاولة توحيد البلاد كان هو “الملك العقرب”، مش نعرمر. بس يقال إنه فشل، أو توفي قبل ما يكمل التوحيد. ومع كده، الأكثر تصديقًا هو إنه هو اللي بدأ الفكرة، ونعرمر هو اللي كملها وحققها.

 

3. وأكثر سبب واضح ومقنع، هو الأثر اللي اتوجد في “هيراقونيوبوليس”، ولما العلماء بصّوا عليه، لقوا على الرأس رمز زهرة بجانب عقرب. والباحثين قالوا إن “الزهرة” معناها “ملك”، و”العقرب” هو الاسم، ومن هنا جه اللقب “الملك العقرب”.

الحضارة الفرعونية مليئة بالقصص، و”الملك العقرب” تحديدًا يعتبر من أوائل الملوك في التاريخ الفرعوني، من الفترة اللي سبقت “العصر العتيق”، والمعروفة باسم “عصر ما قبل الأسرات”، اللي بدأ تقريبًا من ٣٠٠٠ سنة قبل الميلاد.

وسبب وصفه بالأسطورة، مش بس لأنه غامض جدًا ومفيش عنه غير شوية أدلة قليلة، لكن كمان لأنه كان صاحب فكرة “توحيد البلاد”، اللي اتنفذت بعده.

 

أتمنى يكون المقال نال إعجابكم، وانتظروا المزيد من “القصص والحكايات” قريبًا…