رتيبة

شعر: عايدة عبدالعاطي

 

قَفّل مصابيح العينَين

وابعد برجلك حبة

ف القلب ضلعي أنكسر

وأساسه كان دَبّة

لصّم حروفي الملضومين

وامسح دموعي الدبلانين

واوهبلي كف رتيبة يسأل

وِشّ التراب كان ليه حزين !!

ودواه دا فين مبقاش يكفّي

قَطفـُه السحاب سرسب وجع

نزّل ضجيج القلب حاف/ مبقاش مكفّي

أنا راضية جدًا بالألم لو كان مِشَّفّي

واكتب رتيبة بعرض حيطة كبيرة جدًا

اكتبلي ماتت والفراق مبقاش يشوف الهَدّ فيا غير ويدّن

سطّر كويس العياط من غيرها إيه

وإن الضجيج لو راح لصحرا م اللي فيه

يُصرُخ صِريخ هتشوفه رملة تقول بَدِيه

وتشوفه حجرة من البكا هتموت عليه

مش قصدي أطَوّل ف الحديث

كل الحكاية إن أنا من غير رتيبة

زي الفقير ومعاه روشتة تعَيّشه

وما زال مِعَتّق ف الجدار باسم أنه عايش يشتريه