(+18) الحب مش مبرر للغلط – الكاتبة إسلام محمد

---

(+18)
الحب مش مبرر للغلط:-
بقلم الدكتورة/إسلام محمد
استشاريه الصحه النفسيه والإرشاد الاسري والزواجي ودكتوراه في التنميه البشريه وتطوير الذات وصاحبه كتاب البحث عن الذات

في زمن الدنيا بقت سريعة والأفكار متلخبطة، بقى في شباب وبنات بيخلطوا بين الحب الحقيقي وبين الشهوة، وبيفتكروا إن كلمة “إحنا بنحب بعض” ممكن تفتح لهم باب الحرام. بس الحقيقة إن الحب الصح عمره ما هيطلب منك حاجة تغضب ربنا أو تجرح كرامتك.

يا بنتي، لو حد بيقولك بيحبك، شوفي هو بيحافظ عليك ولا بيحاول يستغلك. اللي بيحب بجد بيصون، مش يضيع. ويا ابني، الرجولة مش إنك تستغل مشاعر بنت، الرجولة إنك تحميها وتخاف عليها أكتر من نفسها.

متخليش العاطفة تعميك عن الصح والغلط. الحلال بيبدأ بالاحترام وبينتهي بزواج في النور، لكن الحرام طريقه قصير ونهايته ندم وحسرة. الحب مش كلام حلو وخلاص، الحب أفعال، وصبر، وتحمل، وخوف على بعض.

خلي حدود ربنا خط أحمر، عشان اللي بيحبك بجد مش هيطلب منك تكسرها. خلي نفسك غالية، والعفة أغلى هدية ممكن تحافظ عليها، لأن أي حاجة بتروح، لكن سمعتك وكرامتك لو راحت، صعب ترجع.

دلوقتي بقى في ناس بتفتكر إن الحب مبرر يعملوا أي حاجة حتى لو حرام، ويقولك: “إحنا بنحب بعض”، وكأن الكلمة دي تمسح الذنب! لكن يا جماعة، الحب الحقيقي عمره ما هيكون على حساب رضا ربنا ولا على حساب كرامتك.

يا بنتي، أوعى تسيبي نفسك للخلوة مع شاب تحت مسمى الحب، لأن الخلوة باب واسع للشيطان، وماحدش معصوم. اللي بيحبك بجد هيجيلك من الباب الصح ويتجوزك، مش يقابلك في الخفاء ويخليك تعيشي في ذنب.

ويا ابني، أوعى تستسهل الحرام أو تقول “مفيش حد شايفنا”، لأن ربنا شايف وبيكتب كل حاجة، وذنوب الخلوات هي اللي بتسود القلب وتخلي البركة تروح من حياتك.

انتهاك الحرمات مش بس معناه الغلط الكبير، ده كمان أي تجاوز في الكلام أو النظرة أو اللمسة، كل ده بيتسجل عليك. افتكر دايمًا إن اللي بيبدأ صغير بينتهي كبير، والشيطان مش بيجيبك مرة واحدة، هو خطوة بخطوة لحد ما تقع في اللي كنت بتستبعده.

الحب الصح هو اللي في النور، قدام أهلك وأهله، وفيه احترام وخوف على بعض. احمِي نفسك من اللحظة اللي تفتكر إنها بسيطة، لأنها ممكن تغيّر حياتك كلها للأسوأ.

خلي قلبك نضيف، وحافظ على حدود ربنا، عشان لما تيجي تتجوز تبقى فخور بنفسك مش مكسوف من ماضيك.