هكتب

كتب: الشاعر عاطف محمد

هكتب كلمة

هكتب فكرة

هكتب كل سلامي لبكره

هانده كل حروف النور

وارصصها فوق الفكرة

وألضم فيها سطر طويل

متعلق فيه القناديل

سطر بطول السما والأرض

متوضي وبيصلي الفرض

مش هاتوقف أبدا يوم

أني أدون واكتب ذكرى

عدت يوم شايله الأحداث

حر فى قلمي

حر الفكر

والأفكار بجمال البكر

هفضل اكتب وأملا الكون

هيخطي كلامي العراقيل

والأقاويل

والفكر المتغطي بسرابيل

راح يهدم سد الممنوع

ولامرة أبدا هايجوع

وهيفضل دايمًا ينبوع

يبقى طوفان مايوقفه حد

أيوه بجد

جوه العتمه هكتب برضه

رغم حصار الضلمة هاعدي

وازرع وردي ف كل مكان

أصلي نتاج مدن الأحلام

اللي دروبها مسفلته شمع

ولا تعرفشي أبدا دمع

كل أشجارها عايشه السمع

مليانة تفاح وزهور

والعمدان بت سقط نور

نور مش عادي

لونه يراضي

حتى الريح لو كانت قوة

مش ممكن أبدا تطفيه

ولا تستجري يوم تداريه

هكتب حلم بيبرق حلم

كل ثواني فيه من علم

واقع ماسك سيف العدل

عمره ماخلف أبدًا ندل

ولا إرهابي وشه جبان

ولا بيتاجر بالأديان

هاكتب بالحبر المصرواي

اللي بحبه دايما ناوي

لونه مسكر مابيبهتشىي

مابيسكتشي

حبر تشمه تقوم شبعان

وتعافر مع كل الصعب

وتعلقه مشنوق فوق كدبه

وتعيشه أيام الرعب

هكتب مليار كلمه وكلمة

جوه الوقت وجوه الغنوة

جوه صدها مليار قوة

هكتب لوحة

منقوشه برسم الأجداد

فيها القرب…. مافيها بعاد

فيها موكب جاي بالنصر

كل طبوله …..زمن أسياد

كل الكون يطلب فى رضاهم

علشان يبقى تحت سماهم

موكب فيه فرسان بجياد

فارد كل رايات أمجاد

موكب يركع له الأبطال

ف هزيمة أركانه محال

هكتب وصفة مااتوصفتش

وصفة فيها الرؤية رسالة

ماشية بقوة مش متشالة

ولا عاجزة تدافع عن روحها

ولا يقدر كائن يجرحها

حتى إن كان من ولد محال

هنسج من كلماتي قماش

كل ثواني فيه ينعاش

مهما يلف الوقت يعيش

مش من غش ولا من شاش

بعد سنين وسنين موجود

كل ثانية ف عمره يجود

هكتب حب ماجاش أساطير

ولا حلمت بيه الأمامير

اللي جمالهم مالهوش زى

دايمًا نابض دايمًا حي

هكتب حب بيعشق غيه

ولا كاتب قرب من ضيه

ولا شاعر عمره كتب زيه

أصل كلام الحب معايا

عطره وفكره وكل مافيه

جوه دفاتر روحي وقلبي

هكتب لعب وهاكتب قرب

حبه سلام مع حبة صبر

هكتب كل تاريخ فى بلادي

مين كان قائد

مين كان عادي

مين غطاها

ومين عرّٕاها

مين غماها

ومين ورَّاها

مين من دمه

داب فى دماها

هكتب أرض وفرض وصوت

مين بحياته منع الموت

عن أحلامها وعن أيامها

هكتب جامع ويا كنيسه

هوصف كل خطاوي حثيثه

وإن الكون بدأت خطواته

من أرضي الغالية المحروسة

هكتب دِين مزروع جوانا

مخلوط دايمًا جوه دمانا

هكتب مد

وعند وسوق

حركة قوية وكلام ذوق

مع تحويجة

غروب وشروق

هكتب نبض الناس الغالية

واوصف فيهم ثانية بثانية

هكتب مصر

أد الكون…… وكل الدنيا