مكتوب عليا

شعر: سارة خالد محي

مكتوب عليا أخبي أحلامي
ف سلو بلدنا حلم البنات عيبة
مكتوب أشوف الفرح قدامي
لاكن أشيل الحُزن بالويبه
ذنبي الوحيد كان بس تاء تأنيث
كان العقاب الؤد بالتوريث
بس بطريقة دفن مختلفه
كان العقاب حلمي يبقى رخيص
واقتل طموحي واحضر الدفنة
مكتوب من وانا طفلة
يحرم عليا اللعب بعروستي
أفرد ضفايري وأرمي كراستي
علشان عريسي برا مستني
واسمع ف بيعي الخلق بتغني
بفرحة زوال عاري من أهلي
مكتوب أخلف بنت تشبهلي
واحفر بايدي القبر جمب سريرها
مكتوب مصيري يبقى هو مصيرها
واعجز باني أخالف التقاليد
حلمك يا بنت عبيط
فاياكِ تتمني برا حدود البيت
اوعي عنيكِ تزوغ وتغوي ف مره علام
البنت دايما ورا فمتطلعيش قدام
الرأي مش رأيك والزوق مهوش زوقك
فاياكِ تتجرأي وتطالبي بحقوقك

البنت طوع جوزها ومتشتكيش منه
وان كان كبير عنها ميبعبوش سِنه
وان مد ايده ف يوم
مترميش عليه اللوم
ولا تشتكيه لاهلها
البنت مش حقها الاعتراض والرفض
ولا ليها تطلع سما هي مكانها الارض
البنت ف بلدنا زي آسير الحرب
مسلوبه من حقها ومباح تموت من الضرب

ومباح يسيل دمها
ومباح يموت حلمها وتموت ورا منه
وبدال ما ياخدوا العزا ع قبرها يغنوا