شعر: سارة خالد محيي
كان ليا أب جميل
كان نور ف عتم الليل
وكان ف النهار ضلّهْ
حِمل الحياه علّه
وقابلها بالضحكة
وكات ضحكته حلوة
وحضنه كان أحلى
كان يشفي ويطيب
أنا أبويا كان طيب
ومكنش فيه مِنه
لو أحكي سنين عنه
مايكفهوش برضه
كان ميفتوش فرضه
ولا صوم ولا وِرد
كان الدفا ف البرد
وكان أمان البيت
وف يوم أنا اللِ صحيت
وصحيته مصحيش
كان نفسي متجيش
اللحظه دي ليك
ولا أشوف ف يوم موتك
كان صعب أنادي عليك
وترد بسكوتك
كان نفسي متسبنيش
كان نفسي أنت تعيش
وأنا اللِ أموت قبلك
أنا نفسي أقابلك
لو حتى كام ثانية
مش عايزة من الدنيا
والله غير حضنك
وحشني الكلام منك
ووحشتني لمتنا
يا حُزن حيطان بيتنا
من بعدك يا ضي عنيا
والله مش بأديا
مش عارفه أبقى قوية
زي ما حلفتني
طب قولي ليه سبتني
من غير ما تحضني
روحت وخدت معاك
قلبي الجميل مني
كان نفسي أكون وياك
علشان تونسني
علشان ماليش غيرك
ف دنيتي الواسعة
وحيدة بالتسعه
وأنت الي كنتلي
اسمك دا كان ضلي
واسمي بيه مرفوع
مش كل حزن دموع
منا برضو بفرحلك
لما بشوف سيرتك
بكل جميل بتتجاب
بيقولوا كان طيب
ومكنش يقفل باب
ف وش اللِ يحتاجله
ولما جه أجله
كسر قلوب الكل
الموت دا أكبر ذل
للحي مش للميت
مش قادرة أبطل أعيط
ولا أبطل أندهلك
شوفت هناك أهلك
يا بختهم بلُقاك
هما ف نعيم وياك
وأنت ف مكان أحسن
لكن لا بد أحزن
أصل الفراق قاتل
وأنا مُتّ ف غيابك
بكره هنتقابل
وتوصل روحي لبابك
شايله بأيدها الورد
وبكره جاي أكيد
ونتلم زي العيد
ف الجنة مش ع الأرض
المزيد
مقام القلم بقلم د. عبير عبد المجيد الخبيري
على أطلال الضمير بقلم الشاعر المهندس أحمد علي سمعول
جبل المعجزات بقلم د. عبير عبد المجيد الخبيري