زهرة الصبار – خالد عبد العظيم عويس
ياااا زهرة الصبار يا مصبّرة حالي
برويكي ليل ونهار من دمع أحزاني
شيلي همومي شويه ومُر أيامي
وعلميني الصبر على حالي
بشوف فروعك خضرا يااا صابرة
لكن خضار محروق
إزاي فروعك خضرا
وإزاي ماليها الشوك ؟
بتفكريني يا صابرة بحالي
الضحكة مالية العين
لكن الحزن متداااري
حزني وشوكك من طريق واحد
حزني من حبيب خاين
وشوكك من زمن جاحد
لا الخاين لحبه يعود
ولا شوكك يفارق عود
وزي ما جرحي على الجبين مكتوب
أسهر وأحب وأحن وأدوب
على عودك يا صابرة كمااااان
صبرك على الزمن مكتوب
صبرتي أيام وليالي
متحملة القسوة
وصابرة وبتداري
وانا كل ما بشوفك صابرة
بتفكريني بحالي
أمانة عليكي ياصابرة
يا شايفة حالي يا طاهرة
خليكي جنبي مونساني
في حزني مصبراني
وفي جرحي مطيباني
حتى أما أموت يا صابرة
خليكي على قبري
شاهدة على قدري
وانا برضوا هرويكي
من بحر أحزاني
وأمانة إن حد زارني
أو يوم حد افتكرني
وجه وسألك عني
احكيله عن حالي
عن جرحي وأحزاني
عن دمعي اللي كان غالي
عن حبي اللي كبّرته
وربيته في أحضاني
كان وردة خضرة في بستاني
وياما رويتها بحناني
أتاريني بربي وبكبر
في وردة جدورها ليا
وريحتها لحد تاني
واوعي تنسي تقووووليله
ده كان حاله من حالي
المزيد
بين مد وجزر بقلم شهد طلعت
شفقٌ بلا ثقافة بقلم مريم الرفاعي
هل سينجو الكتاب من تحديات العصر بقلم سها مراد