الوِحدة أسلوب حياة
بقلم : هبة الله حمدى عبدالله
الوِحدة بتيجي فجأة…
إنك تبقى وسط ناس كتير، وبتدور على حد يحس، مش بس يسمع… حد يشوفك بجد، مش النسخة اللي بتضحك قدامهم.
الوِحدة مش دايمًا سكون… أحيانًا بتبقى صوت عالي جدًا محدش سامعه غيرك.
بتبقى قعدة طويلة مع أفكارك، بتتكلم مع نفسك كتير، لحد ما صوتك الداخلي يبقى غريب عليك، بتسأل، وتجاوب، وترجع تسأل تاني، كأنك تايه جوه دايرة ملهاش باب خروج،
وكل فكرة فيها شوكة، وكل ذكرى فيها حتة منك اتكسرت ومحدش لاحظ.
في نص ضحكة، في لحظة مفهاش أي حاجة تستدعي الحزن، بس قلبك يقرر يفتكر كل حاجة مرة واحدة.
وأسوأ حاجة فيها ، إنك تتعود عليها.
تبقى مرتاح في وجعك، ساكن فيه، كأنك لو خرجت منه هتضيع أكتر.
بس يمكن الوِحدة مش نهاية، يمكن هي استراحة طويلة بتفهم فيها نفسك، المكان الوحيد اللي بتشوف فيه حقيقتك من غير تزييف.
ويمكن أصعب حاجة فيها، إنها بتخليك تستحمل نفسك،
وأجمل حاجة فيها، إنها ممكن تخليك تلاقيها.
المزيد
فتاة أهلكتهاالمواقف بقلم إيمان يوسف احمد
-سَــأُريك من أنــا بقلــم شــاهينـــاز مـحمــد
هذه رحلتي وعدت بقلم مريم الرفاعي