اللي ضامنك هيمرمطك – الكاتبة إسلام محمد

مقال بعنوان:( اللي ضامنك هيمرمطك)
بقلم الدكتورة/إسلام محمد
استشاريه الصحه النفسيه والإرشاد الاسري والزواجي ودكتوراه في التنميه البشريه وتطوير الذات وصاحبه كتابي البحث عن الذات و طوظ

في الحياة، دايمًا هتلاقي نوع معين من الناس، أول ما يحس إنك ضامنه، أو إنك مهما حصل مش هتسيبه، يبدأ يغير في طريقته، يتبدل من الطيبة للاستهتار، ومن الاهتمام للإهمال، ومن التقدير للتقليل. وكأن الأمان اللي إديتهوله خلى في قلبه شعور بالغرور مش بالراحة. وده أصل المبدأ اللي بنسميه ببساطة: “اللي ضامنك هيمرمطك.”

اللي ضامنك مش بيخاف يخسرك، فبيتصرف براحة مبالغ فيها، يختفي وقت احتياجك، يردّ وقت ما يحب، ويتكلم معاك كأنك دايمًا تحت الطلب. ينسى إنك إنسان ليك طاقة ومشاعر، مش بنك مفتوح للحب والعطاء. والمشكلة إنك في البداية بتبرر تصرفاته، تقول يمكن مشغول، يمكن زعلان، لكن الحقيقة إنك بتسمح له يمرمطك وأنت ساكت.

اللي ضامنك مش بيقدّر وجودك، لأنه اتعود إنك مش هتمشي. يمكن يزعلك، ويمكن يقلل منك، ويمكن يخليك تشك في نفسك، ومع كل ده تلاقيه مطمن إنك هتفضل مكمل، لأنك بتحبه أو لأنك “مش من النوع اللي بيبعد.” وهنا الكارثة، لأنك لما تدي أمان من غير حدود، الطرف التاني ساعات بيعتبره ضعف مش حب.

لكن الحقيقة إن اللي بيحافظ على العلاقة مش الأمان المطلق، بل الخوف المحترم على فقدان الشخص. لما تبقى عارف إن اللي قدامك ممكن يبعد لو اتأذى، هتحافظ عليه، وهتوزن كل كلمة، وهتحاسب نفسك قبل ما تجرحه. أما لما تحس إن مهما عملت هو هيستحمل، ساعتها بتتحول العلاقة لمعركة طرف واحد دايمًا بيتألم، وطرف تاني دايمًا بيتدلّع.

اللي ضامنك هيُمرمطك طول ما انت ساكت، وطول ما بتبرر وبتسكت علشان متخسرش. بس الحقيقة إنك بتخسر نفسك قبل أي حد. علشان كده، لازم تسيب مساحة غموض بسيطة، مساحة خوف محترم، ومساحة كرامة تمنع أي حد إنه يستهين بيك.

اعرف دايمًا إن الكرامة مش ضد الحب، وإنك لما توقف لنفسك حدود، الناس هتحبك وتحترمك أكتر. لأن محدش بيقدّر الشخص اللي بيسيب نفسه للتمرمط وهو راضي.
فافتكر دايمًا الجملة دي كويس: “اللي ضامنك هيُمرمطك، إلا لو عرف إنك ممكن تمشي.”