الاكتئاب بقلم صافيناز عمر   

الاكتئاب بقلم صافيناز عمر

الاكتئاب مش دايمًا بيبان على شكل دموع أو عزلة أحيانًا بيكون ضحكة خارجة بالعافية، أو جُملة “أنا تمام” قالها حد وهو بينه وبين نفسه بيغرق في سكون تقيل. الاكتئاب مش دايمًا صوت عالي، ساعات بيكون صمت طويل جدًا، كأنه صمت الروح وهي بتفقد شغفها بالحياة خطوة بخطوة.

اللي جرب الاكتئاب يعرف إن الوجع مش في القلب ولا في العقل بس، الوجع بيبقى في كل حاجة: في طريقة التنفس، في أول لحظة تصحى فيها، في آخر لحظة قبل ما تنام. تحس إن الدنيا بقت رمادية، لا فيها أبيض ولا أسود، كل حاجة لونها باهت، حتى الأحلام اللي كنت زمان مستنيها بحماس بقت مجرد (تفاصيل مش مهمة).

الاكتئاب يخليك تشوف نفسك غريب… في بيتك، وسط الناس، جوا نفسك. يخليك تحس إنك تايه في متاهة مالهاش باب خروج، وإنك مش قادر تشرح للناس إن اللي بيحصل مش كسل ولا ضعف، ده شيء أكبر منك، وجع داخلي ساكنك ومش راضي يسيبك.

هو مش بس حزن، هو إحساس إنك فقدت التواصل مع العالم، وإنك بتعيش كأنك مش عايش. دماغك مليانة ضوضاء، بس مفيهاش فكرة واحدة مريحة. قلبك بيخبط كأنه بيحاول يفتكر معنى الأمان، بس مش لاقيه.

الاكتئاب يخليك تفقد الإحساس بالوقت، بالأيام، بالناس، بنفسك. يخليك تبص في المراية ومتعرفش الشخص اللي قدامك… كأنك بتشوف نسخة منك انطفأت من غير ما تحس إمتى ولا ليه.

بس في وسط كل ده، فيه حاجة صغيرة جدًا جوا كل واحد مكتئب، نقطة ضوء ضعيفة أوي، بس موجودة. أحيانًا النقطة دي بتبقى صوت بسيط جواك بيقول: (استنى شوية)، وده كفاية عشان تكمّل يوم تاني. يمكن مش النهارده، يمكن مش بكرة، بس دايمًا فيه احتمال بسيط إنك تخرج من الضباب ده، إنك تتنفس من غير ما تحس بالوجع اللي كان بيخنقك، إنك تضحك بصدق من تاني.

الاكتئاب مش نهاية… هو وجع صامت محتاج يُتسمع، محتاج احتواء مش نصيحة، محتاج حضن مش حُكم. محتاج حد يقولك (أنا فاهم)، مش (شدّ حيلك ) .