رتب أولوياتك

بقلم الدكتورة/ إسلام محمد
استشارية الصحه النفسيه والإرشاد الاسري والزواجي ودكتوراه في التنميه البشريه وتطوير الذات وعضوة في منظمة حقوق الإنسان المصريه وصاحبه كتابي (البحث عن الذات و كتاب طوظ)

في وقت الزحمة اللي احنا عايشين فيه، ومع كتر الضغوط والمسؤوليات، ساعات بنلاقي نفسنا تايهين… لا عارفين نركز، ولا عارفين نِكمّل في طريق واضح. وده ببساطة عشان أولويتنا بقت ملخبطة.
كل حاجة بقت مهمة… لحد ما ولا حاجة بقت مهمة فعلًا. وهنا ييجي دور إنك تعيد ترتيب أولوياتك من أول وجديد.

أول خطوة إنك تعيد تفكير أفكارك… آه زي ما بقولك. اقعدي مع نفسك شوية، واسأليها:
“أنا ليه بفكر في ده؟”

“إيه اللي بيشغل دماغي طول الوقت؟”

“هل فعلاً الموضوع يستاهل كل القلق ده؟”
هتتفاجئي إن نص الحاجات اللي شاغلة بالك… مش مستاهلة حتى دقيقة تفكير.

وبعدين تعالي للمواقف… مش كل موقف يستحق إنك تقفي عنده، ولا كل كلمة تتقال لازم تردّي عليها. في مواقف بتعدّي كده مرور الكرام، ومواقف تانية فعلاً بتعلم فينا وتخلينا نكبر ونتغيّر. رتّبي مواقفك… شوفي إيه اللي يستاهل تقفي عنده، وإيه اللي تجاهله أحسن ألف مرة.

وطبعًا نيجي للناس… أهم نقطة.
في ناس غالية، وجودهم في حياتك مكسب، دول اللي سُكاتهم راحة وكلامهم حكمة، اللي بيمسكوا إيدك من غير ما تطلبي.
وفي ناس وجودهم استنزاف… بياخدوا طاقة أكتر ما بيدّوا، وبيعلموكي دروس بس بطريقة موجعة.
وده طبيعي… أصل مش كل الناس مكتوب لهم يكملوا المشوار.
في ناس محطتهم جاية في طريقك… وفي ناس محطتهم خلصت ونزلوا.
وإنتِ مش مطالبة تشيلي حد غصب، ولا تمنعي حد ينزل… كل واحد وله دوره وزمانه ومكانه.

اقعدي مع نفسك واعرفي:
مين اللي يستحق يبقى في أول الصف؟
مين وجوده بيكبرك؟
ومين اللي وجوده بيمحّلك حدّودك وبيستهلكك؟
مين يكمل… ومين تعمليه شكرًا وتنزليه من أولويتك؟

إعادة ترتيب الأولويات مش قسوة… دي رحمة بنفسك.
لما تعيدي ترتيب أولويتك، هتعرفي تمشي بخط ثابت، وتقلّلي التشتت، وتعيشي براحة أكتر.
هتعرفي إن أولويتك الأولى دايمًا هي إنتِ… سلامك النفسي، صحتك، وقتك، وراحتك.

وصدقيني… لما أولويتك تبقى مظبوطة، حياتك كلها هتبقى أخف، وعقلك هيهدى، وقلبك هيرتاح.
الترتيب مش رفاهية… ده ضرورة.
ابدأي النهارده… رجّعي كل حاجة مكانها الصح… وشوفي حياتك هتتغير إزاي.