بيني وبين أوجاعي
الكاتبة إيمان يوسف احمد
أنا مش دايمًا قويّة زي ما الناس فاكرين…
جوايا حاجات كتير مكتومة، وأوجاع ساكتة، وذكريات بتعدّي من قلبي كإنها ماشية على أطراف صوابعها… لا عايزة تتنسى، ولا عايزة تتكلم.
أنا والوجع بينّا حكاية طويلة…
أوقات يحسّ إني ضعيفة فيشدّ عليّا، وأوقات يشوفني واقفة فيسيبني شوية… كإنه بيختبر صبري، ولا بيعلّمني إزاي أقوم بعد كل كسرة.
وجعي مش دايمًا صوت عالي… ساعات يبقى هادي،
ساعات يبقى في عين بتزوغ،
وفي ضحكة متكسّرة،
وفي كلمة كنت هقولها وسكت.
بس رغم كل ده…
لسه واقفة.
لسه بعافر.
ولسه قلبي، برغم كل الوجع، لسه قادر يحب ويخاف على الناس ويطبطب عليهم… حتى لو محدّش حس بيا.
أنا اتعلمت من ألمي…
إني مهما وقعت، بقوم.
ومهما انكسرت، بتجبّر.
ومهما اتعذبت… لسه جوايا نور صغير بيقولّي:
“كَمِّلي… متخافيش… ربنا شايف.”
وأنا هكمل…
مش علشان الألم خف، ولا علشان الدروب اتعدلت…
لكن علشان أنا استحقّ أعيش… حتى لو على حافة الوجع.
المزيد
استمر أنت أفضل بقلم سها مراد
صاحب الأصل بقلم إبن الصعيد الهواري
حلقي كفراشة بقلم بثينة الصادق أحمد (عاصي)