لِـ/إيمان نبيل الوكيل “يقين”
_يوه يا ماما حتى يوم الأجازة مش سيباني أنام براحتي
=قومي يا بت نوم أي دا إلي لحد الضهر
قومي روقي معايا الشقة عشان الناس إلي بليل دي
_ أنا مالي أنا بترويق الشقة وهما ولا مالي أنا بالناس إلي جايين
=مالك إزاي يعني وإنت أساس الموضوع إنت ناسية إن دا عريس جاي يتقدملك
_ يا ماما أنا مش عايزة أتجوز بالطريقة دي ولا بالأسلوب دا
=أمال عايزة تتجوزي إزاي يعني
_بصي يا ماما أنا مش عايزة أتجوز دلوقتي
=نعم يا ختي مش عايزة أي
_اتجوز يا ماما أي غريبة دي أنا عايزة أفضل جمبك كدا مونساكي
=وأنا جمبي بيوجعني يا ختي مش عايزاكي معايا أنا عايزاكي تغوري من وشي كفاية عليك كدا
_ يا ماما ااا…
= إنت هتقومي تروقي معايا الشقة ولا أقوم عليك بالشبشب وبعديها أسلط أبوك عليك
_خلاص قايمة
وبتمشي وبتبرطم في سرها وتقول: أمال لو مكنتيش أمي كنت عملتي فيا أي
_ ها يا ماما أي رأيك كدا حلو
= أي يا بنتي إلي إنت عملاه في نفسك دا
_ ماله يا ماما مهو حلو أهو فستان حلو وواسع وخمار
إلا إذا مش عاجبك لبسي أنا ممكن أغير وأقعد عادي ومطلعش إنت تؤمري
=دلوقتي انتي تؤمري
دا إنت غلباوية
حلو يا ختي حلو اطلعي يلا وامسكي الصينية واقفي ورا الستاره وأول ما أغمزلك تيجي علطول
_ حاضر
يارب يكون ودانه شبه طبق الدش عشان أقدر اطفشه
ماما غمزلت لي وانا دخلت بكل ثقه وحطيت الصينية على الترابيزه
ماما اتكلمت وقالت: يلا يا جماعة نسيب العرسان لوحدهم شوية
العريس: احم
مردتش عليه ولا بصيت حتى
-مش هنتكلم
_هنتكلم في أي يعني وأنا في الاخر هرفضك
-ترفضيني!
_ايوة طبعا أمال أنت فاكر أي
– ضحك بصوت عالي مفكرني بهرز البيه
_بصتله بضيق_ انت بتضحك على أي هو أنت فاكرني اراجوز قدامك
-لا مش ال….
_برمي نكت يعني ولا بتتريق على كلامي
– مش كدا والله انا….
_ملامحي اتغيرت وابتسمت يا راجل بتبرر أي بس اضحك اضحك _حد ضامن عمره؟ تضمن تخرج من هنا سليم؟
-اه والله….أي؟
_ يعني مثلًا ممكن اتخنق منك أرمي عليك مية نار
– أي مية نار ودي هتجبيها منين؟
_ يا راجل دي عندنا في المطبخ دي ممكن نعمل بيها غسيل معدة لما نبلع ازاز بالغلط
– ازاز بالغلط؟
_ بصتله بجديه أيوة طبعًا بالغلط ليه أنت فاكرني زومبي مثلًا احنا ناس طبيعين
– اه طبعًا هو حد قال غير كدا
_ضيقت عيوني وطيت صوتي _ أولًا محدش عارف
– عارف أي
_ووطيت صوتي أكتر _ششش ليسمعونا
– هما مين
_همست أهل تحت الأرض
-بصلي بصدمة تقصدي الجن
_ انتفضت وعليت صوتي بسم الله الحفيظ سامحوه ميعرفش ميعرفش يا أسيادنا والله غلبان بصتله مش أنت غلبان
– رجع بضهره بخوف اه والله غلبان
_ عاوز تتجوز؟
– لا والله ولا بقيت أنفع للجواز أصلا
_ عارف طريق الباب
– مش كان يمين في شمال
_ وعلطول وخد الباب في ايديك
مع السلامة يا قمر
كيف تطفشين عريسًا.
المزيد
قبل أن يمضي الوقت بقلم الكاتبة بثينة الصادق أحمد (عاصي)
فخ الدوبامين بقلم نورهان راضي كحله
تشتت العقل حين صار العالم كلُّه في شاشة بقلم أمل أسماعيل أحمد