شعر: أمنية وليد
كنت قاعد يوم وببكي
للهوى بحكي وبشكي
من حبايب غدروا بيا
من محبه زيف لقيتها
متقنين دور الضحية
وشوش ملايكة لكن
شياطين ومتداريه
اه من الوجع سجّان
حكمه قاسي عليا
أبدي وده حكمه كان
الظلم عنده غيّه
كان الوجع ده ريح
بسموم تهد فيا
يا مين يقيد حياتي
وشموعي المنطفيه
ويزق الفرحة لقلبي
من تانى يحييها
سبق الحزن بمراحل
وده كان معديها
أيجوز نعد النجوم
أو نسمع خطاويها
حياتي صعب الفرح
يوم يخطيها
محال الروح تنسي
ف يوم مِبكّيها
زلزال وشرخ قلبي
إعصار وهد الروح
عفن مشي ف دمي
وياه لفين ما يروح
شايف بعيني حاجات
فرْح بهيئة جروح
إنسان وجاب آخره
طاب الزمن ده ليه
طبطب عليه بحنان
أتاري الوهم فيه
صبحت حياته غروب
ونور الشمس طالع
يا هل ترى هيفيد
كلام وما حد سامع
وبأي يفيد اسفلت
شارع مهجور وضايع
حياتي شبه كابوس
وأنا فار للتجارب
الصح بقا معكوس
والموجب صبح سالب
مانيكان معدوم الروح
كومبارس وقت الحاجة
زمن مسمى الطيابه
صبحت فيه السذاجه
من كتر دموع عنيا
خدي محتاج ترميم
وقليبي بينزف جوا
مفهوش جزء سليم
القلب الطيب بيت
والحزن وحده مقيم
زهقت من النيكوتين
وسهر وحدي ساعات
أو أن احتاج ونيس
ولو مجرد شات
فالاقي وهم عايشه
مفيش معايا صديق
حبيب مش موجود
والحزن ليا رفيق
يبست شراييني
والروح كمان بتضيق
محتاج أوضه إنعاش
بسرير ومعاه أجهزة
دكتور يقول إني
حياتي دى معجزة
وإنها أيام وأموت
وأموت أنا فعلًا
وأتحط جوا تابوت
وأفارق دنيا المصالح
وضحكي يبقا سكوت
سمعت همي يا هوى
جواك دلوقت اي
أكيد قلبك اتكوى
بتقول ده عايش ليه
ايوا شايل وصابر
لكني مش أيوب
طاقتي نفذت وربي
صبرت بالمكتوب
لجل راحه ف آخره
لجل فرحه ودايمه
جتلك يا رب حزين
وبايت كتير مغلوب
عوض صبري ده خير
يا ربى يا رب قلوب
المزيد
أنفاس جديدة بقلم ميليا عبدالكربم
عهد الصداقة الأبدي بقلم رحمة صديق عباس
سندي فى الدنيا بقلم د. عبير عبد المجيد الخبيري