كتب: عبد الله محمد ألماظ
بنشوف هنا..
الضِحك نُص الجدعنة
ومفيش دفاتر للحساب
الكل عارف إيه عليه
و”صفاء“ مَلاك الرحمة لابسة البالطو لابيض
وإيديها غرقانة في تقليب المِعسِّل
والجزمجي بيراقب الأحداث في صمت
وزباين القهوة بتترجى الزمن..
علشان تطول القعدة أكتر من كدا
إيّاك تقول مانجا ولمون
هتلاقي صاحب جلَّابية بيحدفك بالسخرية
قهوة صفاء ماتحبِّش الناس أغنيا
سِتِّين سنة في البُن والشاي والكازوزة
إيّاك تقول الشيشة قول ”كنشة وجوزة“
كتالوج قهاوي القرية زي قانون طواريء
بيطبقوه على أي حد بدون مُعارضة
بنشوف هنا..
القهوة بيت للِّي مَلوش،
ملجأ لكل الهربانين من دوشة العالم هناك،
إسْتشْفا للعَضَلة اللي زاد الحِمْل فوقها
الدومنة ساحة حرب مش لعبةْ تَسالي
ومفيش مجال للهُدنة غير وقت المطر
وما دومت صاحب فِكرة هتعيش للنهاية
و صفاء هِنا..
مش قهوجيَّة و بس ولا صاحبة مكان،
تقدر تقول المُرضعة
أو واحدة نزلت م السما علشان تشيل كل الهموم
سِتِّين سنة في المِهنة دي رغم انها ست بصحيح..
يا للعجب
بتْرُش مَيَّه يوماتي قُدام المكان
علشان إذا تعدّي البنات
ترفع عبايتها من الطرف اللي تحت
خوفًا من الطين والتُراب
لقطة ”تَسُرُّ الناظرين“
كل اللي قاعدين يفرحوا
وتطول كمان القعدة أكتر من كدا
الفقر بيخليك ذكي ويعلمك..
تُعصر دماغك حد ما تجيب الجِنيه
وبتكتمل خطّة صفاء!
والجزمجي بيراقب الأحداث في صمت
”الغاية بتبرر وسيلة فِعْلها“
ولو افترضنا العكس مثلا في الحكاية
وصفاء مارشِّتش الحياة..
من جردل الميَّه اللي في إيديها الشمال
كان مين هيضمن إن جزمة حد زاير
تتعاص من الميَّة اللي من جردل صفاء..
ودا رزق راح للجزمجي
كان مين هيضمن؟
ولو افترضنا العكس مثلا في الحِكاية
كان مين هيضمن رِزقي في كتابة قصيدة؟
المزيد
عهد الصداقة الأبدي بقلم رحمة صديق عباس
سندي فى الدنيا بقلم د. عبير عبد المجيد الخبيري
رحيل : بقلم: سعاد الصادق