اختك يا واد – الكاتبة إسلام محمد

(اختك يا واد)
بقلم الدكتورة/إسلام محمد
استشاريه الصحه النفسيه والإرشاد الاسري والزواجي ودكتوراه في التنميه البشريه وتطوير الذات وصاحبه كتاب البحث عن الذات

الأخت مش مجرد حد عايش معاك في نفس البيت، الأخت نعمة من ربنا وسند حقيقي، وهي اللي بتشاركك ضحكتك وزعلك، وبتدعي لك في الغيب من غير ما تطلب. الأخت أمان، ولو ضاع الأمان ده، عمر ما هيتعوّض.

ياواد، خُد بالك من أختك، مش بس إنك تمنع عنها الغلط، لكن كمان تكون ليها ضهر وسند. هي مش محتاجة بس حد يقولها “ما تعمليش كده” أو “خلي بالك”، هي محتاجة تحس إنك معاها، وإنك بتحترمها وبتقدرها. البنات بطبعهم قلبهم حساس، كلمة منك ممكن ترفعها السما، وكلمة تانية ممكن توجعها وتكسر بخاطرها.

الأخت أمانة، والأمانة دي هتتسأل عنها قدام ربنا. يعني لو شفتها محتاجة نصيحة، قولها بحنية مش بعنف، ولو لقيتها محتاجة دعم، ابقى أول واحد يسندها. ياواد، خليك صديقها قبل ما تكون أخوها، اسمع منها وتكلم معاها من غير ما تحسسها إنك قاضي بتحاسب.

خلي بالك إن المجتمع ساعات بيكون قاسي على البنت، ونظرة الناس بتكون مؤذية. دورك الحقيقي إنك تحميها مش من الناس بس، لكن من الوحدة والخوف. خليك موجود، طيب القلب، وشد حيلك عشان تبقى قدوة ليها.

وعلى فكرة، “الغيرة” مش معناها إنك تعقد حياتها وتخليها تحس إنها في سجن، لأ، الغيرة الصح إنك توجهها بحب، وتخليها تثق في نفسها وتعرف إنها غالية.

اختك ياواد مش هتلاقي زيها، ولو يوم بعدت أو اتجوزت، هتفتكر كل لحظة كانت معاك، وساعتها هتقول يا ريتني احتويتها أكتر، يا ريتني كنت جنبها أكتر.

فخلي شعارك دايمًا: أختي أمانة، وأنا ضهرها اللي ما ينكسرش.