حبيبة

شعر: سعاد أيمن

أنا قولت زمان:

ختم الحياة محفور على خصرها

كل اللي قال السر في التحنيط ..عبيط

أنا عشت مليون سنة من نظرة في عينيها

كل نصوص الآلهة كِدْبَه

سر الحياة مش شمس ولا مايه

سر الحياة في مَسكْتِيّ لاِيدها

لسه السؤال هي والحل تعجيزي

زي الفروق الكاهله في الدنيا لا ينفع تسأل ليه ولا تجاوب

ربك أمر فتح البلاد بالصُلح معرفش ليه طالبه ادخُلِكْ عنوه

كل الرُسل قالت: إن القصاص بقصاص

و دي حرب قلوب وإن النصيب مكتوب ولو أنتِ مش ليا

ف أنا جايلك بهذا النص والمفتتح

أنا قلبي زاهد في الحياة لروحك

عشت السنين قبلك بُكَا وضحكت على إيدك

عقلي الضلالي اشتكى من كتر تأخيرك

ف كم حرب لجل احتلالك خوضتها، وأما استوطنك أعلنتي الهزيمة

أسوار مدينتك والحصون هدتني قبل ما أهدها

قلبك كأنه سيف عليّ وأنا قلبي حمزة حالف يموت ولا يخسرك

عقلك ماله ضل الخطى ولا أنتِ الصليب في حروبهم الرابعة

يا حبيبه أنا جيشي مَل من الهزايم

ك صيدا أنتِ مهما الحصار اشتد أبوابها مقفولة

يا حبيبة الحرب ايه غير دمار، إن كان حصارك عني مفهومه انتصار فالفهم وإن صح مبدأ غبي

٥٠ يوم والحرب شغاله، ٥٠ يوم بألف سهم وسهم

إن كان على الغنيمة فصدقيني الباقي فيا عمره ما يعوض فيكِ نقص

وأنا مش شاعر جاي أخطفكِ بالنص

ولا أخطفك أهو يبقى خطف بصُلح ..