كتب الشاعر: نبيل عبدالرحمن
ريش
جربت تعيش
متحرر من كل قيودك
صاين احلامك ووعودك
ثابت في الكون معني وجودك
ضد التهميش
جربت تنام مرتاح بالك
مجبور مطمن علي حالك
لا بيسرح في الحزن خيالك
ولا شايل هم رغيف العيش
ولا اتحولت لطير مدبوح
اتصابت بعدوي فصام الروح
أصبحت مشارك ضلك فيك
نصك بايع والتاني شاريك
بصمات افكارك بتدينك
تتمسك بأوامر دينك
يا أسد متسيد في عرينك
يرمولك غدر في خطواتك
تتحول عبد لشهواتك
مذنب من غير تشبيه ولا فيش
عايش بتعاني من الحرمان
والفكر يصيبك بالتوهان
انسان ولكنك مش انسان
ساعة ملاك وساعات شيطان
مرة إمام بتصلي في جامع
مرة تكون عربيد متسلط
مرة تعدي عجوز في الشارع
مرة فلاتي تحب وتشقط
تحلم تبني كيانك دائما
خطواتك ثابتة ما تمشيش
جسمك دايب من اوجاعك
أكتافك مش قادرة تشيل
مجتمعك مستغني و باعك
وطنك بارع في التمثيل
عايز تملا بجد مكانك
عرض خد كورسات تطبيل
رشح حد يقول بلسانك
ياكل نايبك بالتغفيل
الساحة مشهد سريالي
والإعلام أصبح تضليل
عمره ما يرمي الضوء علشانك
علي أمثالك حبة ريش
فاكر بطموحك في الدنيا
تملك جوز جناحات و تطير
الاحلام دي مجرد ورطة
ياما دفعنا تمنها كتير
مش هتكون فارس في بلاد
رأسمالية جحود وفساد
مات صالح عاشوا ذي الأوتاد
وضع لا يسمح بالتطوير
خايف أطق أقول واتكلم
في حروفي هيبان تجريح
أنا وانت وكل اللي شبهنا
حفنة ريش في مهب الريح
بتشيلنا الدنيا وتهبدنا
من غير خوف من غير تصريح
عارف يا فقير
كل الريش زينا مساكين
والأوطان في الأصل طيور
احنا علي ضلوعها محاوطين
بيهزوا جناحات مصالحهم
ننقلهم بسلام امنين
لو شرد الدنيا يجرحهم
نبق لهم حنة وبساتين
لو نسمة برد تطوحهم
نبق لهم عافية وبطاطين
فيه اوطان عصافير وكناريا
وفيه أوطان غربان خفافيش
يحصل أيه لو كل العالم
يتوحد فيه كل الريش
نسند بعض ما دومنا غلابة
نعدل تاني قانون الغابة
علي راس الظالم شواكيش
لو خذلونا في أي مكان
لو نسيوا ان الدنيا براح
نعمل حاجة ترد كياننا
ونطير طائر تمساح
كله هيعرف معني وجودنا
نملك بيتنا وقوتنا وزادنا
تبق الوحدة في ايدنا سلاح
عمرك شوفت طاووس أوطانك
يبق جميل من غير الريش
شوفت حمامة وغصن زيتون
دون ما يكون المسك ختام
ياه يا سلام
لما يعدي العمر سلام
ريشك يا نعام هايروح الشام
ويدفي ضحايا القهر العام
سنة وشيعة
أو حتي دروز أو علوية
و الأمن هيحضن كل جنين
في الاقصي وحيفا كمان و جنين
ونحرر قدسك يا فلسطين
والحلم العربي يعود بيقين
يوصل للنسبة المئوية
ريشك يا حمام علي كل مكان
تحضن خطواته جنوب لبنان
يتوحد مع اصحابه كمان
من طوكيو بكين من صين ويابان
نصنع بالوحدة حياة وأمان
ونعمر به كل الدنيا
ريشك يا منقط يا سمان
يزرع بعيدان القمح سودان
ويوزع طرح الخير أطنان
ما يبات في العالم حد جعان
ونصلح بايدينا قدرنا
بص في عز الليل لقمرنا
سبب الشوق و الزوق وسهرنا
شوف كم نجم جميل حواليه
شوف الشمس بقوة دورها
كاسية الأرض دفاها ونورها
طايرة وكله يدور حواليها
فكر مرة وشوف الدنيا
تلقي الكون ده نجوم وكواكب
سابحة في ملكوت رب خلقها
كيف ما خلقنا
حبة ريش علي ريش علي ريش
عن المؤلف
المزيد من الأخبار
فلسطين، جرح الإنسانية المفتوح على اتساعه، حيث يُختبر الصبر في وجه القهر، ويُروى التراب بدماء الشهداء
غزة الحرة الأبية
حكاية الإختيار