كتبت: لبنى عادل يوسف
مبقتش استنى سؤالكم لو هموت
وجودكم فى حياتي زيادة ضغوط
نوركم يغيب وروحي تروح
ولا نوركم فى حياتي اللى كله جروح
كفاية يا دنيا وجع ده أنا نفسى أفوق
ومن كاس السعادة نفسى أدوق
ده من كاس المر أنا ارتويت
وكل مرة بمعجزة عديت
ده لولا رحمة رب العباد كنت اتقتلت
ولولا ثقتي الكاملة فيه
والله ما كنت صبرت
ده لو مش حرام أنا كنت انتحرت
لكن مع نفسى لحظة وقفت
لو عملت كده أنا هبقى كفرت
ووقفت أشوف أنا امتى ليها دعمت
بس كفاية كده
خوفي على جنب لازم أركنه
وقلبي من العتمة للنور لازم أظهره
وخوفي من مجتمع مريض لازم أنهيه
واللى عامل حبيبي وهو بيكرهني
ورا ضهري أرميه ما هو أنا مش هأذيه
لكن هدعى ربنا يهديه
استغربت مش كده
ما هو ده قلبي وحنيته اللى بتأذيه
وقسوة الناس اللى عمرها ما غيَّرت فيه
ولا هسمح أنه يقسى فى يوم
بسبب حبة ضغوط وهموم
وده كله من فضل ربي
اللى دائمًا برجع ليه وادعى
وأقوله ياارب أنا جيت
جيت استودعك قلبي
وأنا عارفة أنه بيك مش هيضيع
لكن غصب عنى بكيت
على ناسي اللى تعبوني فعنهم اتخليت
على حبايبي اللى بخذلانهم اتذليت
وحلمى اللى عشانه كتيير تعبت
وعمرى ما في مرة يئست
وبقلب واثق في الخير ياما دعيت
كفاية كفااية يا دنيا ده أنا والله اتهديت
وأملي في ماضيكي خاب
يوم ما حلمي وتعبي كله ضاع
واللى كان عامل إيه حبيبي
فى وقت الصعب ده باع
وحاسس أن مستقبلي فيكي كله عتاب
كله دموع وفراق أحباب
بس والله لا نسيت ولا هنسى رب العباد
وطبعًا قمت دعيت بقلب على حلمه محروق
وعلى فراق اللى كان فاكرهم ناسه مخنوق
وقلت يارب خفف على قلب موجوع
مش هيرتاح ولو بشلالات دموع
ده مش هيخف أبدًا غير برحمتك عليه
ورسالة من القرآن تزرع السكينة فيه
وعمرى ما رجعت من عند ربي مخنوق
دائمًا برجع مرتاح وحاسس بهدوء.
المزيد
سندي فى الدنيا بقلم د. عبير عبد المجيد الخبيري
رحيل : بقلم: سعاد الصادق
الشمس مشرقة بقلم عبير عبد المجيد الخبيري