شكلك حزين – الكاتبة إيمان يوسف أحمد

شكلك حزين
الكاتبه /إيمان يوسف احمد

شكلك حزين رغم كل المحاولات اللي بتعملها عشان تبين عكس كده، تضحك وتتكلم وكأنك بخير، لكن عينيك بتصرخوا بحكايات محدش سمعها. في ابتسامتك ارتباك، وفي صمتك ألف وجع، وفي قلبك أسرار بتتمنى لو في يوم تخرج للنور. يمكن اتعودت تخبي دموعك عن الناس، ويمكن أقنعت نفسك إنك لازم تفضل قوي عشان محدش يشوف ضعفك، لكن الحقيقة إن الحزن باين فيك أكتر من أي كلام.

الحزن مش دايم، ومش ضعف، هو لحظة صادقة بتقول إنك بني آدم لسه قلبه بيعرف يحس، ولسه عندك القدرة إنك تحب وتتألم وتعيش. الناس اللي بيظهروا دايمًا أقوياء من برة، بيكونوا أكتر ناس متوجعين من جوا.

خلي بالك إن الحزن مش نهاية، لكنه بداية لفهم نفسك أكتر. يمكن يفتحلك طريق جديد أو يعلمك درس مهم. صدقني، حتى الحزن ليه معنى، لأنه بيخلي الفرح بعده أصدق وأعمق.

فإوعى تكره ضعفك، وإوعى تلوم نفسك على دموعك، لأنها مش عار ولا هزيمة، بالعكس، هي العلامة اللي بتقول إن قلبك لسه عايش ولسه قادر يحب من جديد.