الوحدة أرحم من عشمٍ يُوجع القلب بقلم علياء العشري

بقلم:علياء العشري

العنوان :الوحدة أرحم من عشمٍ يُوجع القلب

أحيانًا الوحدة مش اختيار، لكنها بتكون أرحم من إنك تفضل مستني اهتمام من ناس وجودك عندهم مجرد وقت فراغ.
تتعب نفسك في السؤال، وتبرر الغياب، وتخلق لهم الأعذار، وفي الآخر تكتشف إنك كنت وحدك من البداية، بس كنت متعلق بالأمل.

العشم في الآخرين جميل لما يكون في مكانه، لكن لما يتحول لانتظار دائم، بيبدأ ياخد من القلب أكتر مما بيديه.
وساعات بتتعلم إن الصمت أريح من كثرة الكلام، وإن البُعد أهون من قربٍ يجعلك تشعر أنك غريب.

الوحدة مش معناها إن مفيش حد حواليك، الوحدة الحقيقية إنك تكون وسط ناس كتير، وقلبك مش لاقي شخص واحد يطمن له.
وعشان كده، اتعلم تكون سند لنفسك، ومتستناش من حد يديك قيمة أنت أصلًا تستحقها.

يمكن الوحدة توجع في البداية، لكن وجعها صادق… أما العشم في الشخص الغلط، فبيوجعك كل مرة بنفس السبب، وبنفس الخيبة.

وفي النهاية، مش كل اللي بنحبهم لازم يفضلوا، ومش كل اللي وقفنا جنبهم هيقفوا جنبنا…
فخليك كريم في محبتك، لكن بخيل في عشمك، واحفظ لقلبك مكانًا لا يدخله إلا من يعرف قيمته.