أوتاد لا تهتز بقلم أمجد حسن الحاج

أوتاد لا تهتز
بقلم أمجد حسن الحاج

يا جماعة الخير…
الناس اليوم صارت مثل الريش، أي كلمة تهزهم، وأي ظرف يطيّحهم.
واحد زعلان من رسالة ما انردت، وواحد قلبه مكسور من نظرة، وواحد باع عمره عشان موقف.

لكن وين الأوتاد؟
وين الناس الثابتة؟ الناس اللي لو مالت الدنيا كلها ما مالوا؟
الأوتاد ما هي اللي ما تتوجع، الأوتاد هي اللي توجع وتضحك، وتطيح وتقوم، وتكمل.

الأوتاد هم إخوانك الفقراء اللي بطونهم خاوية وجباههم مرفوعة.
هم اللي لو أعطيته كسرة خبز يقول “الحمدلله”، ولو منعته يقول “عسى خير”.
ما يمد يده ذل، ولا يبيع كرامته عشان لقمة.

فكونوا أوتاداً لبعضكم.
إذا طاح أخوك، سنده. إذا ضاق صدره، وسّع له. إذا نسي نفسه، ذكّره.
الدنيا ما تستاهل نخسر بعض عشانها.

القوي مو اللي يصرخ أكثر، القوي اللي يسكت ويحضن وقت الغضب.
والغني مو اللي عنده فلوس، الغني اللي عنده ناس إذا احتاجهم لقاهم.

اثبتوا يا أوتاد… فالأرض ما تثبت إلا بكم.