أنا سايبه البيت

شعر: سارة خالد محيى

بعتله رساله مضمونها:
من الست الي فشلت تصونها
وزدت ف ظلمها وقسيت
أنا سايبه البيت
ومش هقبل انك تغصبني
ع إني ارجع ف قراراي
ومش هقبل تاني تضربني
وتجبرني وتقولي اختاري
ومش هقبل انك تلغيني
واكون ف حياتك زي النيش
ومش هسكت وقت متأذيني
واقوم من تاني واقدر اعيش
أنا سايبه البيت
بعد محاولاتي بأني اتأقلم ع العيشه معاك

وبقى صعب أكمل وياك
والاصعب أفضل مهزومه
و أعلم قلبي يكون هادي
ومش وحدي الست المظلومه
وبأن وقوعي دا شيئ عادي
وسهل يكون بعديه قومه
وطلعنا اساسا عايشين زق
أنا عشت حياتي اقول حاضر
وجه الوقت عشان تسمع( لأ)
أنا فوقت خلاص من الدوامه
وشربت المر معاك ياما
وصبرت لحد ما حيلي اتهد
وجه الوقت علشان اخلق سد
أنا سايبه البيت المرادي
لأجل إني تعبت ومليت
مليت من كونك شخص اناني
مليت اعملك ايه تاني
علشان بس تكون راضي
مليت من زعلك ع الفاضي
مليت من الوحده برغم وجودك
مليت من صوتك وسكوتك
وزعيقك دايما وخناقتنا
ليه عايش تهدم ف حياتنا
كام مره حلفت هتتغير
وبترجع تاني تزيد اكتر
وببقى اول حد بتيجي عليه
وأنا هوجع قلبي معاك ليه
دأنا من يوم ما بدأت
حياتي معاك وأنا بدي
من عمري ومن طاقتي
ومخدتش غير كل اهانه
ومعامله محدش يقبلها
أنا امتى ما نمتش زعلانه؟
وتتأسف وتقول سامحيني
وطريقتك تفضل ع حالها
وحالتنا كل ما بتطول
بترجع للصفر من الاول
ف الاحسن لينا اننا نبعد
من غير ما نحذر ونهدد
وكفايه الي احنا وصلناله.
وقفلت الفون وجريت ع الاوضه احضر شنطي
وسرحت شويه بتفكيري وف اهلي
والناس وكلامهم
مش هسلم ابدا من لومهم
وهطلع ف الاخر غلطانه
وان قولت طلاق جايز ملاقيش حد يوقفلي
وان قولت ارجع افضل طول عمري ندمانه
واحتارت شويه اعمل ايه؟
الناس هتحس ازاي بيا
ومحدش عاش الي انا عيشته
ومحدش عارف ايه فيا
معلونه الناس
ملعونه الناس لو تجبرني
اقبل بالقشه الي تغرقني
مع ان الشط قصاد عيني
ملعون الناس لو تجبرني
اختار الموت مع ان بأيدي إني احييني
أنا سايبه البيت ومش هسمع ليه ولا ليهم
جه الوقت عشان اسمع نفسي
ومقبلش اتعذب وارضيهم
ومقبلش باني امسح اسمي
ومقبلش باني اعيش جاريه
واخضع لكلامهم وعاداتهم
ملعونه عادتكم لو تكسرني
ملعونه عاداتكم لو تجبرني
اقبل بالعيشه بدون روح
واقبل باللصق يداوي جروح
واقبل بالضل بدون راجل
واقبل بالدنيا بدون ساتر
واقبل بالبيت من غير حيط
أنا سايبه البيت.