شعر: خلود سعد
بتشبه لي
في كل حاجة بالملّي
وبتحلّي، تملي مرارة الأيام
ويومي بيحلى بوجودها
دا من أول ما أقوم م النوم
لحد الليل مايجي وأنام
بتشبه لي
في طبعي وكل تفصيلة
لدرجة إني أحيانًا
باشوفها واحدة م العيلة
دي غير كل البشر هيَّ
جميلة بشكل مش ممكن
ومهما أوصف معدية
ساعات باحتار في تكوينها، ومن عينها
تبان مخلوقة معجونة
بطيبة/ وشاربة حنية
دي عسولة وزغلولة وساكنة جوا بنية
رقيقة بتشبه الغزلان
وصوتها لما تتكلم بحسه كمان
ولو ضحكت بأشوف الكون
في عز الضلمة بينور
تغير الشمس من نورها وتتهور
قمر سبحانه من أبدع ومن صوّر
غريبة البنت دي جدًا
دي فيها كل ما اتمنيت
دي حسيتني ولفتني
وأنا طول عمري ما اتلفيت
باشوفها صاحبي أحيانًا
ساعات أختي
دفء أمي وحضن البيت
وفيها كل ما اتخيّل
قولوا لي ازاي باشوفها نهار
في عز الليل ما بيليّل!
كتير باشتاق أكلمها ولو غابت ب أحن لها
ولو زعلان بدون تفكير
ب أروح طوالي وأشكي لها
كأني رجعت م الأول بقيت عيل
دي حدوتة وفيلم وقصة وحكاية
دي ضحكاية
وفرحة من السما هلا
جميلة الطبع والطلة
عسل صافي
ومنها الشهد يتحلى
دي وش الخير
ويجي الخير يا عالم بس غير منها!
دي واحدة لما بتفتّح
تطل الشمس من عينها
دي أغلى قصيدة ب أكتبها وأرتبها
بدون أوزان ولا قافية
دي نية كالحليب صافية
ومن عيلة وبنت حلال
حبيبتي بتشبه الأطفال
حروفي تايهه محتارة
ومش لاقي كلام يتقال
دا حتى الشعر مش عارف
ومش قادر على ناصفك
يغور الشعر لو تعجز
حروفه حبيبتي عن وصفك
يا توأم روحي وزيادة
وكالعادة باشوفك من بقيت أهلي
وأكتر واحدة في الدنيا
بتشبه لي
عن المؤلف
المزيد من الأخبار
الظلمات في نهاري
سيدة النساء
في_حضن_الليل