حين تُقيَّد الأجنحة بقلم هاجر أحمد عبد المقتدر

حين تُقيَّد الأجنحة

بقلم/هاجر أحمد عبد المقتدر

كان واقف على حافة العالم،
مدينة كاملة تحت قدميه،
سماء مفتوحة قدامه،
لكن صدره ملفوف بحبل.
طائر صغير،
ما عملش حاجة غير إنه اتولد بجناحين،
غير إنه صدّق إن الطيران حق طبيعي،
غير إنه حلم بس إن المسافة بينه وبين السما مش مستحيلة.
الحبل مش بس حوالين جسمه…
الحبل حوالين صوته،
حوالين رغبته،
حوالين كل مرة قال فيها “أنا عايز أطير”.
الغريب إن اللي ماسك الحبل مش باين،
لكن أثره واضح.
زي خوف متربي جوانا،
زي كلام سمعناه كتير لحد ما صدقناه:
“خليك مكانك”
“الوقوع وجع”
“اللي زيك ما بيطيرش بعيد”.
والمدينة تحت،
مش مهتمة بطائر مربوط،
مش شايفة غير نفسها،
زحمة وأسمنت ووجوه بتجري ورا يوم جديد.
ولا حد حاسس إن فوق،
قلب بيخبط من كتر ما نفسه يرف.
هو مش عاجز…
جناحه سليم،
عينيه لسه فيهم لمعة،
لكن الحبل أقوى من المحاولة.
أصعب قيود مش اللي بتربط الجسد،
أصعب قيود اللي تخلي الطيران فكرة مرعبة،
وتخلي الأمان سجن،
وتخلي الحافة نهاية بدل ما تكون بداية.
يمكن في لحظة شجاعة،
عضة صغيرة في الحبل،
رفرفة عنيدة،
قرار إن السقوط أهون من العيش مربوط.
لأن الطيور ما اتخلقتش عشان تتفرج على السما…
اتخلقت عشان تبقى جزء منها.