شعر: أمنية وليد
جريح والجرح طال
والهم قاتلني
جرح الزمن قتّال
والحزن غازلني
والحلو بقى صبّار
مُره معذّبني
والموت شكله بيحلالي
طاير حواليا
بيبكي على حالي
وكل ما فيا
نِزِلْت البحر بسفينتي
فجَفّت الميه
حَكيت للبحر عنى
جريح و ما حسوا بيا
دي الفرحة محبوسة
والضحكة منسيّة
وف عز جرحي بقول
مقتول يا دنيا آاااه
ومين قال مالك
احكيلى يا ولداه
والصبر مني انتهى
وأنا مانيش أيوب
وضهري مني انحني
والحب بقى مصلوب
لإمتى يادنيا أنا
هفضل كدا مغلوب
بضحك أنا لكن
الضحكة متفبركه
قلبي بقى داكن
والسكة متلعبكه
وكأني أنا وحزني
دايرة ومتشبّكه
قلبي بقى بينبض
نبضة ومقتوله
الحزن بقى يِغْلب
والضحكة مشلوله
ونفَسي بقى يِسْحب
الدمعة من خدّي
وكأن الحزن توب
متفصّل على قدّي
ويشق دروب الضي
عتمة في صدري
ودِبْلت كل أجزائي
توهت أنا مني
وبِيغْزل جرحي من وجعي
أحزان وأنين
أنا حسّاس قوام ببكي
كأني جنين
محتاج لحضن يسعني
يعاملني بلين
جوايا صراع
أوجاع وخداع
منيش طمّاع
قلبي الموجوع
مهوش سمّاع
وبكلّم نفسي بقول
ليه أنا استغربت
قلبي اللب كان مشلول
مات دلوقت
المزيد
معارضة بقلم إيمان مؤمن
حبيبة قلبي الراحلة بقلم إيمان مؤمن عبد العليم
أربع ساعات بقلم إيمان مؤمن عبدالعليم